XX. mendeko Euskararen Corpus estatistikoa

Testuingurua

XVII. Kapitulua

Sozietate anonimoa: akziodun berankorrak

17.1. Sarrera

Argi dagoenez, akzioak harpidetzen dituen akziodunak dagokion ekarpena egiteko konpromisua hartzen du: % 25a gutxienez hasieran eta gainerakoa estatutu sozialetan aurrikusitako eran eta epearen barruan edo, horrelakorik ezean, administrazio-kontseiluaren akordio edo erabakiz.

Azken kasu honetan Merkatal Erregistroaren Buletin Ofizialean iragarri behar da dagokion dibidendu pasiboa ordaintzeko era eta epea.

Egin gabeko despoltsapenak ordaintzeko obligazioa ez da iraungitzen sozietatea desegiten denean.

Akzio baten jabekideek solidarioki erantzungo dute dibidendu pasiboen ordainketaz.

Legegileek ardura berezia izan dute kapital sozialaren zenbatekoa aktibo errealean gorpuztuta egon dadin; horregatik, Legeak behar bezala bermatzen du, harpidetutako akzioetatik oraindik despoltsatu gabeko zatiari buruz S.A.k akziodunen gain dituen kobrantza-eskubideen erreklamazioa.

Gai honek duen garrantzia dela eta, kapitulu hau eskainiko diogu beronen legezko planteamenduari eta kontabilitate-praktikari.

Argi ikusten da, S.A.k bere akziodunen gain egin gabe dauden despoltsapenengatik dituen kredituak kaudimengabeak izan daitezkeela.

Legeak behar bezala babestuko ez balu dibidendu pasiboen kobrantza, ondarearen desoreka gerta liteke, kapital soziala eta aktibo erreala, kreditu horiek berreskuratu ezean, ez bailirateke berdinak izango, S.A.rekin harremanak dituzten hirugarrenen kaltetan eta hauek dira hain zuzen ere Legeak babestu nahi dituenak.

Hastapen-gastuak izateak aurreko printzipioari ekar diezazkiokeen murriztapenek ez dute oreka-printzipioa bera baliogabetzen, gastu horien mugapenez gain, gehienez ere bost urteko izango baitute.

Egin gabeko despoltsapenak akziodunei kobratzea errazteko, harik eta erabat despoltsatu arte behintzat, akzioak izendunak izango direla ezartzen du S.A.en Legeak (52.1. art.an);